Пусан Ұлттық Университеті Госпиталінің (ПҰУГ) жетекші практик хирург-ортопеді, профессор Чжун Саб Ли «АЯЛА» қорының шақыруы бойынша Алматыға өзінің кезекті сапары барысында әртүрлі ортопедиялық аурулармен ауыратын 28 балаға тегін кеңес берді.

3 күн ішінде профессор Ли Асфендияров атындағы ҚазҰМУ №1 Университеттік клиникасында (бұрынғы Ақсай балалар ауруханасы) туа біткен қисық мойынды, сүйек жылауығы бар, жамбас сүйегі қысқа және басқа аурулармен ауыратын балаларды қабылдады. Осы клиниканың дәрігерлерімен бірге емделіп жатқан кішкентай науқастарды қарап шықты.  

Профессор Ли ПҰУГ омыртқа орталығының меңгерушісі және ортопедия бөлімшесінің меңгерушісі болып еңбек етеді. Ол сонымен бірге біздің қордың амбассадоры болып табылады. Биыл тамыз айында «Шеврон» компаниясының қолдауымен біздің қор №1 Университеттік клиниканың екі хирург-ортопедтерін оған оқуға жіберген еді. 2 апта бойы олар омыртқаға, жамбас буынына жасалатын көп және әртүрлі оталарды, аяққа жасалатын, бұлшықетті ауыстырып орналастыру бойынша шағын оталарды көріп келді. Осы екі апталық практика ПҰУГ-де оқып үйренген заманауи әдістемелерді енгізудің арқасында Қазақстанда жасалатын ортопедиялық оталарды мүлдем жаңа деңгейге шығаруына септігін тигізді.